Schnitzelbänke

Schnitzelbank 2024

Euses Süschee heisst das Joor ganz eifach: Oha lätz!
Dr Urs het s falsche Mittel gschprüzt uf sim Rääbeplätz!
Das het alli Rääbe gschwellt, oder ämmel ganz e Huffe.
Vilicht müesst er halt si Wyy verchaufe, statt s Meischte sälber suffe!

S Lama Gaby vo dr Waldgrotte z Buus haut ab uf Wintersinge
und loot sich vomne Wintersinger Alpaka-Hängscht bespringe.
Doo dänkt sich s Gaby so für sich, wäärend em kopuliere:
«Ahaa, so füült sichs also aa, wenn zwee Gmeinde fusioniere.»

Mit der Stroomkchnappheit ischs sone Sach, d Lüt deu vor Angscht scho schwitze.
Sie wei jo nid plötzlich z Nacht dehei im Dunkle sitze.
Mir finde das gar nid so schlimm, gheie nid grad us de Fuege,
denn mir chönne au bi Cherzeliecht ganz guet Fäärnsee luege.

Dr Heiko Vogel vom FCB - das het mä jo gsee choo -
het als Trainer vo däm Club früezyttig müesse goo.
Er bewirbt sich bi dr Eptiger und doo isch öppis draa!
Die müesse uf d Pepitafläsche jo ä neue Vogel haa.

O jee, o jee, o jee, o jee, was macht dä FCB?
Jetzt welle si schyyns als neue Trainer dr Reinhold Messner nee.
Als Alpinischt und Gipfelstürmer sell er dä Club begleite
und sell d Spiiler ufe sichere Apschtiig vorbereite.

Wenigschtens einisch het s letscht Joor doch no d Sunne gschunne:
S Fründschaftsspiil gege Wallbach-Zeinige hei si Ölf-Eis gunne.

Ich stand am Baanhoof voller Freud, mit Rukchsakch und mit Charte.
Am Schalter no es Byleet lööse und denn chani starte!
Doch wyt und breit kei Schalter off, i füül mi ganz elei
und gang schlussändlich, ganz fruschtriert, ohni Byleet wider hei.

Wennd am Baanhoofschalter, s isch zum chotze, wetsch es Byleet chaufe,
denn muesch zerscht vo Gälterchinde uf Lieschtel aabe laufe!

Die Dütsche, die heis abegfaare, s letschte AKW!
Denn hei si eifach dr Macron gfrogt, eb er ihne Stroom chönn gee.
S isch e typische Schwoobedyyl wo gottvergässe hinkt!
Dasch wie wennd bim Noochber goosch go schisse, dass es dehei nid stinkt!

Näbem Zebrastreife duet es Groosi über d Stroos spaziere.
Ich rüef ihm zue: «Settsch ufe Strich, denn cha weniger bassiere!»
Doo schüttlet das Müüeti nur dr Chopf und winkt lachend ab:
«Es wird zwaar alles düürer, aber d AHV längt no knapp!»

Vill lääbe hüt im falsche Kchörber, doo wirsch du fascht vo Sinne.
Z Berlin döört läbt sogar e Leu im Kchörber vonere Wildsou inne.
Eb Frau in Maa, oder Maa in Frau, hesch die freii Waal, gottloob.
Numme im ne Schwoobekchörber bisch halt definitiv e Schwoob.

Es git z vill Wölf in riise Ruudel wo d Bärgbuure verdriesse.
Si risse Schoof und andri Vyycher, drum will me se verschiesse.
Me chönnt die Wölf, statt in de Wälder, in de Stedt lo lääbe,
denn würd sich kei Klimaaktivischt me uf e Stroos go chlääbe.

Jetzt si mir am Schluss mit Singe, d Rääbe si alli düür.
Das Joor gits kei eigene Wyy, mir chaufenen drfüür.
Will das e Huffe choschtet, wennt alle Wyy muesch sälber chaufe,
deu mir no schnäll mit eusem Kässli bi euch duure laufe.

Wenn dir e Huffe gääbet, hei mir kei Durscht me und si froo.
Mir deue villmool «Dankschöön» sääge und s nechscht Joor wider choo.