Schnitzelbänke

Schnitzelbank 2025

Als Wolf und Jeeger si mir doo, euses Motto isch: «Zum Schiesse»!
Mir wärde gfüürchtet, gjagt, verschosse, will mir d Lüt deu verdriesse.
Derbii si mir doch liebi Wölf, deu keini Dier umbringe!
Mir deu ganz harmloos hüt  für euch Schnitzelbänkli singe.

Die Dütsche, die hei vor drei Wuche wider einisch gweelt.
Drum isch dr Scholz jetzt arbetsloos, er het die Waal verfeelt.
Mir wüsste do e neue Tschobb, wo zu dämm Zwärg würd passe:
Versuechs doch emol als Wichtel in dr Migros-Kasse!

Jetzt isch die cheibe Dubai-Schoggi scho wider usverchauft!
Obwohl die es Vermööge choschtet ischs unglaublich, wie die lauft.
Me würd jo gärn mee produziere, das isch sunnekchlaar,
aber dr Kamelmischt, wos als Füllig bruucht, isch in dr Schwyz halt zimmlich raar.

Dr Macron rüeft: «Die Seine isch suuber, me cha dört guet drin baade!»
Er machts grad voor und gumpet drii, zum zeige: S duet nid schaade.
«Er merk nüt anders do bim Schwimme, im Gegeteil, ihm gfalls.»
Hejoo, däm stoot jo au süscht z Frankriich dr Schissdräkch bis zum Hals.

Im Dütsche grasiert wider einisch mee d Muul und Chlauesüüch.
«Gits in dr Schwyz ächt au so Fäll?» frooge mir eus schüüch.
«Chönnts si, dass Teil Nordafrikaner vo däm Wyyrus befalle si?
Die deu am Daag denn muule und Znacht doo chlaue si.»

Dä Amerikanisch Presidänt, das isch jo scho fascht chrankch,
bietet jo eläi scho gnueg füre ganze Schnitzelbank.
Doch leider seit euse Eerekodex, übere Trump duet me nid lache,
will me über Behinderedi keini Schnitzelbänk duet mache.

D Magdalena Martullo Blocher het bis jetzt zwee Woonsitz ghaa.
Dr einti z Meile im Kanton Züüri mit de Chinder und em Maa.
Jetzt woont si nur no uf dr Länzerheid, do muess si sich drii schikche.
Sit däm d Rottweiler z Züüri verbotte si, darf si sich dört nümm lo blikche.

Mir hei eus letschti au e sones Elektroauti kchauft.
Nid öppe wägem Umwältschutz und au nid wills besser lauft.
Aber dr grossi Vorteil isch: Dä Chaare wird nie gschtoole,
denn nach eusne Berächnige längt dr Akku nid bis uf Poole.

Füre Versuech het me im Dütsche s Kiffe legalisiert.
Me will teschde, was dur das Cannabis im ne Köörper inn bassiert.
Im Labor misst me, wie d Lääbewääse das Kiffe deu verschaffe.
Mit Schwoobe sig das günschtiger, als mit Ratte oder Affe.

(Melodie «Die alten Rittersleut»)

Ja so sans, ja so sans, ja so sans die Zunzger Rittersleut.
Ja so sans, ja so sans die Zunzger Rittersleut.

Doo sääge doch die Zunzger Süchel:
«Mir wei e Burg uf eusem Büchel!
S isch euse Wunsch, he gottfriidstutz,
drum verschoonet eus mitem Heimatschutz.
Ja so sans….

Will Lieschtel die Burg nid het welle,
mues me jetzt es Bougsuech stelle!
Dasch reini Schikaane, was die verlange!
Bi dr Farnsburg ischs au ooni gange.
Ja so sans….

Tännike, s Dorff grad näbedraa,
het schliesslich au es Schlössli gha!
Und z Diegte obe, das isch bitter,
isch dr Gmeinipreesi sogar e Ritter.
Ja so sans….

Mir chönne d Zunzger guet verstoo,
schliesslich will me uf Sicher goo
und sich weere mit Armbruscht und Helebaarde
falls d Sissecher e Aagriff starte.
Ja so sans….

Mir si am Schluss und gönge hei in Wald wo mir deu lääbe
und hoffe, eusi Jeeger schiesse no mänge Schuss dernääbe.
Mir jaage nid, mir chaufe s Zfrässe in dr Migros ii,
drum chömme mir no schnäll bi euch mit em Kässeli vorbii!

Wenn dir e Huffe gääbet, hei mir gnue z Frässe und si froo.
Und wenn mir nid verschosse si deu mir s nechscht Joor wider choo.