Melodie: Resi, i hol di mit meim Traktor ab
Am Morge früeh, dört im Duubeloch, fahrt er zu sine Chüeh.
Im Halbschlof no und nid ganz wach hett er no chli Müeh.
Bi dr Weid haltet er si Reform a, stigt ab no halb im Traum.
Denn ghörsch es Krache,
ihm ischs nümm ums Lache:
Dr Reform knallt in e Baum!
Resli, stell doch au di Reform ab!
Resli, zieh d Handbräms a, süscht haut er dir ab!
Resli, au wennd no tröimsch, denn dänk doch dra:
Zieh bim Abstige d Handbräms a!
Im Gjuufel isch das schnäll passiert, doch s isch würklich dumm:
Dr Reform isch total kaputt, dr Baum stoht jetzt chli chrumm!
Es isch wie im ne böse Traum, dr Res wär gärn verwacht.
Doch es isch würklich so!
Res, sig doch eifach froh!
Zum Glück hets dir jo nüt gmacht!
Resli, stell s nächschtmol doch di Reform ab!
Resli, zieh d Handbräms a, süscht haut er dir ab!
Resli, egal was no in Zuekunft chunnt:
D Hauptsach isch, du blibsch gsund!
***
Melodie: Das alte Haus von Rocky Docky
S git im Dorf sone Verein, dä heisst «Natur in Rickebach».
Und dr grüenliberal Mathias macht als Preesi dört si Sach.
Doch gsesch du si riise Hütte frogsch di, isch das no normal?
Oder isch er numme vorne grüen und hinde liberal?
Im grosse Huus vom grüene Mathias, dört isch das ganz normal:
Vornedure grüen und hinde lieberal!
Im grosse Huus vom grüene Mathias chas doch nid anderscht si!
Hätt me anderscht boue, denn wär die Hütte z chli!
Es si Landrootswahle gsi und au dr Mathias macht dört mit.
Sone Platz im Landrootssaal, jo das wär scho no dr Hit!
Aber leider hetts nid ghaue, d Lüt hei ihn allwäg durschaut,
dass mit son’re grosse Hütte s grüen Getue halt gar nid haut.
Im grosse Huus vom grüene Mathias……
Mir hätte do jetzt none Tipp wies chönnt politisch witergo:
In nächschter Zyt isch sicher wider gli e neue Gmeindroot no.
Mitem Mathias chönnt me spare, wenn mir dä im Gmeindroot hei:
Platz fürs Gmeindrootszimmer und d Kanzlei hätt er grad dehei.
Im grosse Huus vom grüene Mathias……
***
Melodie: Ein Bett im Kornfeld
Samschtig Zmittag und es Hochzytsfescht.
Alli fiire, vom ganze Dorf chömme Gescht!
In dr Raine gits e Apéro und ganz vil z Trinke.
Plötzlich ghörsch denn du neume s Ursi flueche:
«Wo isch dr Walli? Immer muess me dä sueche!»
Do taucht er grad uf, usem Weizefäld gsehsch ihn winke.
Es Bett im Chornfäld chunnt am Walli grad rächt,
es Bett im Chornfäld, das isch gar nid so schlächt,
es Bett im Chornfäld suech ich mir irgendwo zum go schiffe.
Es Bett im Chornfäld, das isch alls woni will,
es Bett im Chornfäld, s letschte Bier isch glaub z vill,
es Bett im Chornfäld. Erscht wos ihn überschloht, het ärs begriffe.
Öppis spöter, am Grill bim Fönsi im Garte.
Bis dr Walli chunnt, hei mir lang müesse warte!
Doch er hetts doch no gschafft und er hockt uf sim Stuehl bleich wie ne Chriide.
Ich frog fründlich: «Walli, wetsch nones Bier?»
Doch dä schüttlet dr Chopf und er chörblet scho schier.
Und me gsehts ihm grad a, däm gohts gar nid so guet, dä isch am Liide.
Es Bett im Chornfäld chiem am Walli grad rächt,
es Bett im Chornfäld, das wär gar nid so schlächt,
es Bett im Chornfäld, eifach do irgendwo zum go pfuuse.
Es Bett im Chornfäld, das isch alls won er will,
es Bett im Chornfäld, s letschte Bier isch glaub z vill,
Es Bett im Chornfäld. Zum Glück blibt s Bierli no dinn und will nid use.
Es Bett im Chornfäld chunnt am Walli grad rächt,
es Bett im Chornfäld, das isch gar nid so schlächt,
es Bett im Chornfäld suech ich mir irgendwo zum go schiffe.
Es Bett im Chornfäld, das isch alls woni will,
es Bett im Chornfäld, s letschte Bier isch glaub z vill,
es Bett im Chornfäld. Erscht wos ihn überschloht, het ärs begriffe.
***
Melodie: Im Wagen vor mir
Rada rada radadada…
Im Auti vor mir fahr dr Theo Hilber.
Kei Buck im Auti? Läck, wie cha das si?
Wo n ich so am Studiere bi do fallt mir plötzlich i:
Das muess e ganz e neue Chare si!
Im Auti vor mir fahrt dr Theo Hilber.
Er dänkt bi sich, i chumm halt scho no drus!
Ich fahrt jetzt nümm Benziner, nei ich fahrt e Chlapf mit Pfuus,
bim nächschte Crash lauf do dr Mosch nümm us.
Rada rada radadada…
Im Auti vor mir fahrt dr Theo Hilber.
Chli zügig und er fahrt fascht neume dri!
«Mach doch es bitzli langsam!» - und ich dänk mir hindedri:
Für ihn wär d 30er Zone besser gsi!
Rada rada radadada…
Diese Schnitzelbänke sind das geistige Eigentum der Fasnachtsgesellschaft Rickenbach.
Sie dürfen nicht ohne unsere Erlaubnis kommerziell verwendet werden.