Wüehlmüüs Logo

Schnitzelbank 2020

Als Eskimo vom höche Norde wüsse mir nümm, was mache.
S Iglu schmilzt und d Palme spriesse, die Hitz isch nid zum Lache.
Und sette mir öppe zämäbräche bim Schnitzelbänkli singe,
Muesch eifach ganz gschnäll seckle und eus öppis z Suffe bringe.

D Merkel het im letschte Früelig so Zitterafäll gha.
Mä wüss nid gnau, wohär das chunnt, s föng plötzlich eifach a.
Doch eigentlich isch das keis Problem, wenn d Kanzlere chli zittered,
Si isch eus däwäg immer no lieber, als dä Präsident wo twittered.

Dr Donald Trump will Grönland chaufe! Dä sell das nume mache!
Und no grad dört ahne zieh mit allne sine Sache.
Mir wüsse, dass das komisch döhnt und vilicht chli vermässe.
Doch s chönnt jo si, dass ihn e Yysbär gli drufabe würdi frässe.

England jublet, s isch sowit, mir fiire dä Triumpf!
Ändlich hei mir s doch no gschafft us däm EU- Sumpf!
Doch Brüssel meint, s sig nonig Schluss, s gäb no e Huffe z due.
„Sit sälber Schuld, normali Lüt gönge dört au nie derzue."

D Verschärfig vom Rasissmusgsetz, das duet nid allne nütze.
Wirsch gschtrooft, wenn d öppis Falsches seisch, um Minderheite z schüt
ze. Au mir si so ne Minderheit und wüsste nid, was mache,
Wenn dir ab eus Schnitzelbänkler au nüm dörfdet lache.

Die grüeni Wälle, die het jetzt d Schwiiz au voll verwütscht.
In jedi frei Politikerschtell isch e Grüeni ine grütscht.
Das het ihne mächtig Uftrieb geh, s grüen Maya goht ufs Ganze.
Zletscht loht si no ufem Bundesplatz Härdöpfel lo pflanze.
Mir fände das e Glanzidee, das gsech super us:
Härdöpfel ufem Bundesplatz – und Durlips im Bundeshuus.
Mir gseije do no Sinergie: Peschtizid muesch keini geh,
dr Mischt wo si dört produziere chönnt me grad als Dünger neh.

Bi dr letschte Polizeikontrolle hanni müesse ins Röhrli schiffe,
Will si hei welle wüsse eb i deug suffe oder kiffe.
Wo dä Tschugger s Wässerli prüeft, do verjagts ihn schier:
Das sig 1:1 die glichi Mischig wie im Farnsburg-Bier.
So hei mir vor drü Johr gsunge, hüt gohts is wie de meischte:
Mir chönne eus dä Farnsburg-Brunz bi dene Priise gar nüm leischte.

Scho wider het dr Kim Jong Un Ragete in Himmel glo.
Südkorea und d Russe toobe: „So chas nümm witter go!"
Do schaltet sich d Schwiizer Botschaft i: „Entschuldigung, s isch nid glooge!
Dass si d Flieger gsi vo dr Patrouille Suisse, die hei sich licht verfloge!".

Dä Riise-Cheerus z Gälterchinde het nid numme Fän.
Doch statt alls chli chliner z mache het s OK scho neui Plän.
S nächscht Johr sells jetzt au no grad e Chluuriverbrennig geh.
Und bim erschte Mol do well me schints grad s Vreni Wäber neh.
Drum chauft d Gmeind jetzt s Marabu, mir müesse härzhaft lache,
Denn chönne die räschtliche Cheerusgegner dört inn Theater mache.

S Greta rüeft: „Jetzt muess me handle, s wird all wärmer uf dr Ärde!
Alls was CO2 usstoost sell verbote wärde!"
Do chunnt mir in Sinn, i ha e Schock, lig schloflos in mim Bett,
Was isch wenn die jetzt use findt, das s Bier au CO2 dinn het!

Sit de letschte Wahle isch s uf dr ganze Wält bekannt:
Oltige isch die grüenschti Gmeind im ganze Schwiizerland.
Me chönnt jo dört jetzt d Greta Thunberg als Ehrebürger neh,
Denn würd die s erscht mol in ihrem Läbe es Traktorpulling gseh.

Ä Fischer, dä luägt ganz verdattered in Hallwilersee:
„He Lüt, das isch e Sensation, ich ha e Kaiman gseh!"
Doch denn isch d Entwarnig cho, am Grücht isch gar nüt dra.
Es sig e Zürcher am Schwimme gsi, dä heig d Schnuure offe gha.

Heit dirs au gseh in dene Läde: Die Lüt, es isch eis Glöif.
Jetzt hei mir in dr Zytig gläse: Die möche Hamschterchöif!
Mir chratze eus am Chopf ab dene kuriose Sache
Und froge eus, was ächt die Lüt mit soviel Hamschter mache.

So, jetzt hei mir lang gnue gschwätzt, jetzt wird ghandlet, gottfriedstutz:
Mir chömme jetzt bi euch cho sammle für aktive Klimaschutz.
Vilicht längts füre Schneekanone, wenn mir s Gäld im Kässli zelle.
Oder wenigschtens füre Chüehlschrank, zum s Bier in d Chüehli stelle.
Mir danke euch für euchi Spänd, doch jetzt isch Zyt zum go
Und wenn mir noni gschmolze si, stöi mir s nächscht Johr wieder do.

Diese Schnitzelbänke sind das geistige Eigentum der Fasnachtsgesellschaft Rickenbach.
Sie dürfen nicht ohne unsere Erlaubnis kommerziell verwendet werden.