Fasnachtsgesellschaft
Wüehlmüüs Rickenbach

 

Schnitzelbank 2019

Als Panzerknacker hei mir früehner mänge Tresor knackt.
Hei Banke überfalle und hei Gäldtransporter packt.
Jetzt mache mir s eso wie d Poscht, das duet sich besser lohne
Und chlaue, gemein und hinterhältig, eifach d Subvensione.

 

Buure wo in ihrem Stall Chüeh mit Hörner hei,
Selle vom Bund no Gäld becho. Do seit d Mehrheit: „Nei!“
Das wär nid rächt, wenn d überleisch, eus chasch nid überlischte!
Wenn mir es Horn hei gits e Buess oder chunsch in d Chischte!

 

Wäg däm trochne Wätter hesch keis 1. Auguschtfüür gseh.
Au s Füürwärk hei mir müesse bhalte, zerscht het s eus fascht ein geh.
Denn het s eus gfreut, dass mir alls no hei, s hätt nämlich süscht nid glängt.
Und mit was hätte mir denn z Rotheflueh dä Radarchaschte gschprängt?

 

Z Sissech duet euse Kanton ä neue Wärkhof boue.
Bim Stelle vom Montage-Grüscht het s allwäg eine groue.
D SUVA chunnt: „Dä Bou wird gstoppt!“ Es isch scho chli zum Lache.
Zum Glück si eusi Staatsagschtellte gwöhnt, e Pause z mache.

 

Über eus Rammel duet me z Basel gärn es Witzli mache.
Doch wenn mir gseije, was die Städter triibe, verjagts eus fascht vor lache.
Si müesse d Waremäss und d Muba schliesse, das het jo alls kei Wärt.
Jetzt hei mir dänk die Bebbi no z Oltige am Märt.

 

Mi Mage het dene Bahne z Rust amme nid möge trotze.
Uf dr Silverstar und dr Euromir hanni mängisch müesse chotze.
Hüt han ich nur no bi einer Bahn so richtig Ranzeweh:
In de neue Doppelstöcker vo dr SBB.

 

Sit Joore ghörsches vo de Alte an jedem Mittagstisch:
„Chinder ässet alles uf, dass morn schöns Wätter isch!“
Dä Spruch het gwürkt, mir merkes alli und länge eus an Grind.
Drum hei mir jetzt Klimaerwärmig und ä huffe dicki Chind.

 

Am WEF z Davos dört freut me sich an däm Huffe Schnee.
Und an dä prominänte Lüt, wod überall chasch gseh.
S git numme öppis, wo chli stört: Dr Trump, dä isch nid cho!
Jetzt hei si die cheibe Lawine no vergäbe abe glo.

 

Dä Matsch an dere Fuessball WM bringt eus ganz usem Hüüsli.
Mir drücke d Düüme, fiebere, hoffe und zittere ganz grüüsli.
No drei Minute, no zwee, no eini. E Pfiff und jetzt isch Schluss.
E riise Jubel, denn e Freudeschrei: D Schwobe, die si duss!

 

Lang het euse Trick verhebt, doch jetzt isch s leider gscheh:
Mir hei s ganze gschtohlne Gäld wieder müesse umme geh.
Jetzt si mir arm wie Chillemüüs, s cha drumm nid anderscht si:
Mir chömme halt au das Johr wieder mitem Kässeli vorbi.
Wenn dir e Huffe gäbet si mir glücklich und si froh.
Mir deue vilmol Dankschön säge und s nächscht Johr wieder cho.

 

Diese Schnitzelbänke sind das geistige Eigentum der Fasnachtsgesellschaft Rickenbach. 
Sie dürfen nicht ohne unsere Erlaubnis kommerziell verwendet werden.

.